طريتك "قصيدة"
طريتك
في زمان الغفلة والنسيان
كل ما الغم يدق اوتاده في صدري
يبني مساكن الوجعة
ويمد ايديه للغربان
طريتك
في زمن أصعب
زمن يشبه جفاف النيل
حلمتك نيل
يسقي محبة للعطشان
واشد في صفحتك مركب
مؤمل فيك قدر الموج
مشيت في سكتك للتوج
ومتعشم
تدسي الخيبة من وشي
تشيلي الدنيا من كتفي
واقابلك صدفة بين الفوج
اخاف منك
ومتوجل بقدر الشوق
من البيناتنا من لهفة
تشابي حروفي تجري عليك
واحس بي خنقة المشنوق
وهل في الأرض من مخلوق
بيقدر انه يكفر بيك؟
اخاف ايامي تتوالى
اكون هامش على الهامش
ورعشه شوقي تتعالى
بعد القاك يزيد شوقي
وتومض في الدجى بروقي
وهذا الليل ما زالا
تقول خالد..
بدوزن في وتر حسو
ويمشي وراك بي حدسو
يغني ملامحك اجلالا
انشودة للزمن العصيب
يمكن تجيب
ترنيمة الوطن الخضيب
تهزم معاي غارة الأسى
وتلدي النسيمة من اللهيب
رغم الهواجس الخفية
وخوفي منك يا نبية
لسا صامد وفي انتظارك
واملي فيك تب ما بخيب
تبقى لي حلمي المثابر
يا يصيب أو يصيب
بعد ما احلامي بارت
والنهايات التعيسة
اتقلدتني وما استخارت
والعصافير المسالمة
هيجت احزاني طارت
لو ليالي العتمه صارت
سطر في شجو القصيد
ببقى فوق حضنك شهيد
واغني ليك
غنوة الفرح العنيد
وقلبي لو ضل الطريق
برجاها شمسك تعتلي الساحات
وتصدح بالحقيقة
وتهدي خطوات للرفيق
تعليقات
إرسال تعليق